Flugmódelspjallið - flugmodel.net

TF-FRU -- dagur 73

Nýji flugmaðurinn kom og fékk að prófa að sitja í flugklefanum. Hann virðist passa bara ágætlega.
Svo þurfti hann endilega að setja út á hvernig ég tálgaði vængrótina.
Ofan á flugklefanum er fering sem bognar nærri í hálfhring. Ég gerði þetta með því að vefja tvö lög af 0,6 mm krossviði utan um stál stöng og líma þau þannig saman. Þegar límið var orðið hart gat ég skorið feringuna til og límt hana ofan á vængrótina og skrokkinn.
Ég fékk loksins nýtt epoxý frá FighterAces í Englandi og gat klárað að setja glerfíber á. Það voru hallastýrin sem voru eftir.
Og innan í plássið sem hallastýrin koma í. Það fer að líða að því að ég geti grunnað og pússað vængina.

TF-FRU -- dagur 74

Glerfíber kominn á feringuna frá væng á skrokk.
Glerfíber kominn á neðra borð hallastýranna. Næst er að pússa smá og setja báruplastið á.
Búinn að grunna vængina. Nú fær þetta að harðna almennilega áður en ég byrja að pússa.
Og fyrst ég var með grunnbrúsana í höndunum, þá ákvað ég að grunna hæðarstýrin. Þau eru þá tilbúin undir málningu.

TF-FRU -- dagur 75

Þá var komið að því að líma stélflötinn á skrokkinn. Hér sjást þau þrjú verkfæri sem ég notaði við undirbúninginn: hallamál, band og laser. Ég stillti skrokkinn af með hallamálinu, mældi frá miðjupunkti aftur á stélið með bandinu til að fá það þvert miðað við lang-ás skrokksins og notaði svo laserinn til að fá stélið lárétt.
Til að líma stélið notaði ég epoxý lím blandað með örkúlum (microballoons) svo það leki ekki í burtu. Blönduna setti ég svo í sprautu og smá skreppihólk á stútinn svo ég gæti troðið líminu inn á stélið og fyllt í rifurnar sitt hvoru megin.
Svo strauk ég allt auka lím í burtu með klút vættum í rauðspritti. Þetta verður sérlega snyrtilegt og lítið sem þarf að pússa.

TF-FRU -- dagur 76

Þegar stélflöturinn var orðinn vel fastur var hægt að setja kambinn á. Laser hallamálið var ómetanlegt við þetta verk. Það sýnir bæði lárétt og lóðrétt og ég gat stillt stötðu kambsins eftir línunni sem laserinn sýndi.
Framan við stélkambinn er hryggur sem límist á mitt bakið. Þetta setur gríðarlega svip á FRÚna og er ómissandi á svona Cessnum.

TF-FRU -- dagur 77

Það þarf að jafna út og búa til feringu frá hryggnum yfir á kambinn og, vegna þess að þetta er nokkuð djúpt, þá er best að nota Isopon P-38, sérstaklega vegna þess að það harðnar mjög fljótt.
Það er ekki nauðsynlegt að pússa P-38 alveg slétt. Ég smyr fylliefni á það til að fá slétt fyrirborð. Gallinn við það er að ég þarf að bíða til morguns með að pússa það niður.
Húsið yfir vírana í hliðarstýrið er búið til úr 1,5 mm krossviði.
Það er límt á skrokkinn og ég setti rautt fylliefni á það til að fá það slétt. Ég er ekki viss um að ég nenni að húða það í glerfíber, enda er þetta afar smátt.
Á meðan ég límdi húsið á stalst Stefán (listamaður sem hefur aðstöðu hér á verkstæðinu) til að taka af mér mynd. Mér sýnist að ég þurfi að fá mér nýjan slopp hvað úr hverju.

TF-FRU -- dagur 78

Fleiri plötuskil. Hér koma hryggurinn og stélkamburinn saman. Það eru frekar flókin samskeyti hérna, sérstaklega vegna þess að það er mótað form í kverkinni. Þetta þarf að sýna með fylliefni. Fyrir framan stélflötinn er skoðunarlúga sem ég bjó til úr ál límbandi
Á stélfletinum er heilmikil brún.
Og hún sést hér eftir að límbandið er farið.
Ég notaði meira ál límband til að búa til handföngin á hurðunum.
Fremst á hryggnum er nef formað úr áli og hnoðað niður á bakið. Ég bjó það til úr límbandi og fylliefni

TF-FRU -- dagur 79

Bárurnar fyrir hallastýrin. Búið að setja þær á stýrið neðst og allt tilbúið að setja á hitt stýrið. Bárurnar liggja ekki þvert á hallastýrin, heldur eftir vindstefnunni.
Ég er önnum kafinn að pússa niður vængina, setja fylliefni og pússa það. Þetta á eftir að taka nokkra daga.
Flugmaðurinn frá Premier Pilots setti sig í stellingar eins og Ómar.

TF-FRU -- dagur 80

Pússivinnan er við það að verða búin. Hér er ég byrjaður að setja plötuskil á neðra borð vængjanna.
Og hér eru fyllingar í misfellur á efra borðinu.

TF-FRU -- dagur 81

Plötuskilin eru næstum tilbúin. Hér er seinni vængurinn að klárast. Límbandið komið á. Ég set gult undir því það rífur ekki eins upp grunninn og svo nota ég blátt bílalímband ofan á (3 lög) vegna þess að það er þykkara.
Svo maka ég fylliefninu á. Þegar þetta er þurrt, þá pússa ég það slétt og þá eru plötuskilin komin. Þá þarf ég bara að finna út hvar ég þarf að setja hnoðin.

TF-FRU -- dagur 82

Það er lengi von á einum og ég uppgötvaði að það vantaði að gera eina panel línu á hæðarstýrin.
Svo notaði ég morguninn til að skrúfa nokkrar örskrúfur hér og þar í skrokkinn. Þessar skrúfur fékk ég, annars vegar, frá Mikka Ref, sjá síðu 8, og, hinsvegar, frá ModelFixings.co.uk.

Hér eru skoðunarlok hvort sínu megin á skrokknum.
Festingar á gluggapóstinum að aftan.
Stélkambur og hliðarstýrið.
Kverkin á stélkambinum.