Flugmódelspjallið - flugmodel.net

Áfram skal haldið. Rifjunum er raðað upp á formið og stólar límdir undir til að halda þeim láréttum. Þetta er aðferð sem meistarinn Dave Platt notar mikið og vel þess virði að herma hana eftir. Svo eru settir stólar undir stélflötinn og hann límdur á. Þá er nokkuð víst að hann situr á sínum stað, réttur á alla kanta þar til búið er að planka skrokkinn. Mér fanst ekki nóg af langböndum til að halda undir 1,5mm skinn, svo ég bætti við einu alla leiðina og öðru undir gluggana, því Tommi er ekki enn búinn að ákveða hvort hann vill gler eða límmiða. Það kom hugmynd á einu smíðakvöldi að taka vangasvipi allra í klúbbnum og búa til gluggamyndir af þeim. Hér er svo byrjað að líma 1,5mm balsaskinn á skrokkinn. Hann stífnar verulega upp við það. Hér er búið að planka nefið og byrjað að búa til stjórnklefann. Sá verður laus, svo hægt verður að renna rafhlöðum ofan í skrokkinn án þess að skrúfa nokkuð í sundur. Hér er ég byrjaður að planka afturhlutann á skrokknum. En áður en hann er kláraður og stélkamburinn límdur á, þá þarf að setja upp stýrisarminn fyrir hliðarstýrið. Vírarnir liggja fram í skrokkinn og servóið verður þar sem vængurinn kemur á.

Það þarf að planka Þristinn að neðan og hér er byrjun á botninum á nefinu: Hér er botninn svotil búinn. Áður en botninum er lokað að aftan, þá þarf að setja inn rör fyrir hæðarstýrið (rautt) og stélhjólið. Þá er öll stýringin komin sem þarf aftur í skrokkinn, svo það má halda áfram með plankana. Hér er gluggaröðin hægra megin komin í. Það var mikið spáð og speggúlerað í sambandi við gluggana og hvar þeir ættu að vera, en þetta er líklega ágætlega rétt, svona til að byrja með. Og hér er svo vinstri gluggaröðin. Hún nær ekki eins langt fram og á hægri hlið og það er aðeins minni gluggi í hurðinni.

Það smá skríður hjá Douglasinum:

Klæðningin skríður niður eftir skrokknum. En áður en lengra er haldið með hana, þá þarf að festa vænginn á. Hér er ég byrjaður að búa til festingarnar fyrir hann. Hér eru festingarnar komnar og vængurinn situr nokkuð réttur á (vonandi) Tommi virðist bara nokkuð ánægður með þetta. Þetta er nú farið að líta út óneitanlega eins og DC-3. Balsaklæðningin komin á alla hægri hliðina.

Rosalega er gaman af smiðaþráðunum hjá þér Guðjón og Tommi vel valin drauma vél

Takk Steini
Hafðu augun opin, það er ekki langt í að það byrjar einn stór og mikill.

Sum verk eru þannig að maður hamast í lengri tíma, en það virðist ekkert gerast. Þetta á t.d. við um vængferinguna, þ.e. þann hluta af vélinni sem blandar skrokknum út á vænginn. Ég bjó til (samkvæmt teikningu) undirlagið fyrir þessa feringu út þunnum krossviði og laggði undir skrokkinn. Svo skar ég niður balsabúta sem pössuðu undir næsta langband fyrir ofan og ýttu krossviðnum niður á vænginn. Afturhlutinn á þessu passaði auðvitað engan vegin, eins og sést á myndinni. Ég klippti þá til krossviðarplötu sem ég gat látið passa aftan við vænginn út á skrokkinn. Þetta lítur mikið betur út. Nú þarf ég bara að pússa niður þessa balsabúta og fylla á milli þeirra. Á teikningunni talar hann um frauðplast, en ég held ég skoði aðra möguleika líka.

Gaui skrifaði: ↑30. Sep. 2020 20:54:50 Nú þarf ég bara að pússa niður þessa balsabúta og fylla á milli þeirra. Á teikningunni talar hann um frauðplast, en ég held ég skoði aðra möguleika líka.

Mæli með XPS þrýstieinangrun, fislétt og flott að tálga og auðvelt að pússa hana, þarf að henda inn smá viðgerðarsyrpu með henni við tækifæri. Kjartan ætti vonandi að hafa einhver ráð með að nálgast hana ef hún er ekki til á lager.

Draumavélin hans Tomma er nú farin að líkjast vélinni á Sólheimasandi Svo var nefið snyrt í nefsnyrtivélinni.