Ég er gjörsamlega glænýr í bransanum. Ég fékk í guðsgjöf talsverðan slatta af ofvirkni í bland við hæfilegt kæruleysi og skvettu af hvatvísi. Það var góð gjöf...! Módelflug hefur heillað mig frá því að ég var smá hvolpur og ég er forviða á að ég hafi ekki rokið í það fyrr, með mína eiginleika. En nú er teningunum kastað.
Ég keypti nýverið AÐRA draumavélina mína. Corsair F4U. Framleiðandinn? Tja.... ég er ekki viss, svo við köllum hann bara eBay, þar til annað kemur í ljós. Pakkinn skilaði sér fljótt og vel. Leiðbeiningarnar voru mjög almenns eðlis... sýndu eiginlega HVAR hlutirnir áttu að vera, frekar en HVERNIG þetta væri gert. Það er líka hollt, það fær mann til að hugsa um samsetninguna. En... saman fór dýrið á endanum og núna prýðir hún stofuborðið. Hún verður hengd upp innan skamms fram á vor, enda fengu ofvirknigenin mín mig til að kaupa HINA draumavélina mína... Mustang P51 frá Hangar 9. Það verður þá líklega næsti þráður frá mér!
Meðfylgjandi eru myndir frá samsetningunni!
Kassinn opnaður og stofuborðið lagt undir... við hrifningu frá konunni!
Allt að taka á sig mynd... og stofuborðið enn undirlagt.
Stubburinn lagði til flugmann... Teenage Mutant Ninja Hero Turtle Bob... á stofuborðinu.
Komin á gólfið... konan jafnhrifin....
Og aftur á stofuborðið... en með gulri málningu! Davíð er stoltur af TMNH Bob! Það var samt tragedía þegar ég sagaði hann sundur!
Jæja, svona er þetta... ég er að fjárfesta í trainer og byrjendapakka og öllu tilheyrandi. Svo verður allt klabbið fært yfir í Corsair, þegar það er viðeigandi. Nú er bara að bíða eftir vorinu! Og Mustang!
