Eftir smá leit fundum við vélina loksins en það sást rétt svo í bláendann á öðru hæðarstýrinu frá jörðinni. Eftir að hafa brotist í gegnum trjálínuna enduðum við inn í litlum trjálundi og ekki var uppgangan gæfulegu á fúnu trénu. Fyrir algjöra guðs lukku þá var stigi upp við annað tré í næsta nágrenni sem við gátum gripið til handargagns og eftir að hafa tekið liðsstjóraákvörðun þá var Elli kallaður inn úr bakvarðarsveitinni og sendur upp í tréð.
Eftir mikið brölt og alls konar tilfæringar tókst honum að brjóta sér leið upp úr trjákrónunni og koma höndum á vélina hans Guðjóns. Ekki náðist að slaka henni niður til Guðjóns svo hún varð að fá að gossa síðasta hálfa metrann og þegar Guðjón kemur höndum á vélina þá sker hann sig í lófanum á afturenda vængsins sem er ekki mikið þykkri en rakvélarblað. Eftir að hafa gert að sárum hans þá mætti úrkomubakki á svæðið og hlé var gert á keppni í 27 mínútur, þrem mínútum lengur og það hefði þurft að skipta umferðinni upp í hópa og byrja aftur á þriðju hópnum.
Þar sem heldur var farið að færast mikið fjör í leikinn hjá Kára þá gengu umferðirnar nokkuð hratt fyrir sig eða um einn klukkutíma og fjörutíu og fimm mínútur þannig að við náðum að fljúga þrjár umferðir í dag og þá fjórar umferðir í heildina. Loka niðurstaðan varð sú að Guðjón varð í 55. sæti þar sem hann náði ekki að fljúga í dag, Elli varð í 52. sæti og ég varð í 49. sæti.
Strákarnir hentu mér svo út á miðri leið heim, þar sem ég hitti Espen vin okkar frá Noregi og við urðum svo samferða á liðsstjórafund sem haldinn var í höfuðstöðvum mótshaldaranna ekki langt frá Thisted. Eftir fundinn þurftum við svo að taka strikið beint upp í Hanstholm svo við gætum náð í setningarathöfnina í tíma og þar hitt ég Guðjón og Ella en þeir höfuð fengið far með hinum hluta norska liðsins. Eftir setninguna skelltum við okkur svo í pizzu áður en haldið var heim á leið.
