Bleikisteinsháls - 1.september 2024 - Íslandsmótið í hangi F3F

[Sverrir]

Eftir mikla yfirlegu yfir veðurspánum síðustu daga þá var ákveðið að kýla á að halda Íslandsmótið í dag þar sem dagurinn átti að verða þurr, það reyndist ekki svo! Við Elli mættum rétt fyrir hádegi og fórum að stilla upp hliðum, fljótlega bættist Hannes í hópinn og svo Böðvar og Jón.

Fínustu aðstæður voru, 11-13 m/s og góður blástur í Kára, eftir uppsetningu á hliðum og frekari undirbúning þá fór að hrúgast ískyggilega mikið af skýjum upp við Reykjanesfjallgarðinn og viti menn rétt fyrir kl. 13 byrjaði að rigna. Sjaldséðir hvítir hrafnar sáust líka á svæðinu en Eysteinn leit við og stytti okkur stundir í rigningunni ásamt Bibbu býflugu. Það gekk svo á með smá hléum alveg til að verða klukkan 16 en þá var loksins farið að glitta í bláan himinn.

Rásröðin var sem hér segir:

1. Sverrir
2. Erlingur
3. Böðvar
4. Jón

Við drifum okkur því út á brún og fórum að gera okkur tilbúna í loftið þegar nokkrir dropar birtust til að stríða okkur en þeir fóru þó eftir nokkrar mínútur og hófst þá þurrkakafli mikill sem nýttur var til að keyra á Íslandsmótið. Þar sem við vorum frekar fáir á staðnum, flugmenn + einn aðstoðarmaður, þá ákváðum við að fljúga 3 umferðir í einu svo mótið gengi hraðar fyrir sig.

Gekk mótið að mestu áfallalaust fyrir sig þó Böðvar hafi lent í brekkunni í fimmtu umferð og Jón missti allt samband við sína í 4 umferð þó lúpínan hafi bjargað henni frá skemmdum þá þurfti að tengja allt rafkerfið upp á nýtt og kom Jón svo aftur til leiks í 7 umferð. Níundu umferðinni lauk svo rétt rúmlega sex og var ákveðið að láta það gott heita.

Allt í allt voru flognar 9 umferðir og þeirri lökustu hent út þannig að 8 umferðir töldu til stiga. Hraðasta fyrsta legg átti Böðvar en hann var 2,12 sekúndur í sjöundu umferð en besta tímann átti Sverrir á 46,02 sekúndum í áttundu umferð. Þessa og aðra tölfræði er hægt að skoða í flipunum [Preliminary Rounds | Pilots | Posistion Chart | Rankings | Stats | Graphs] inn á F3XVault.

Aðstoðarmaðurinn Hannes fær kærar þakkir fyrir aðstoðina frá keppendum og mótsstjórn en hann mannaði A hliðið fyrir okkur allt mótið.

Úrslit urðu sem hér segir, takið eftir meðalvindhraða hverrar umferðar, áhugasamir geta skoðað nánari greiningu á vef F3XVault:

IslandsmotidF3F2024urslit.png (39.98 KiB) Skoðað 1792 sinnum

[Ágúst Borgþórsson]

þið eruð ótrúlega flottir

[Böðvar]

Góður dagur með frábærum félugum og vinum. Það leit ekki vel út að hægt væri að halda mótið þegar fór að rigna, en með smá þolinmæði og dágóða bið í bílunum upp á Bleiksteinshálsi, þá stytti upp að lokum. þetta var fyrsta hangflugið mitt á nýju sviffluguni minni og hún var aðeins vanstillt og villt fyrir hangflugið, en snillingarnir Sverrir og Erlingur hjálpuðu mér að fínstilla sendinn, takk takk félagar. Eftir nokkra leit á Fordinum sínum náði Jón V. Pétursson að fynna okkur upp á Bleiksteinshálsi. En sjón er sögu ríkari, góða skemmtun.

[Sverrir]

Gaman að þessu, takk Böðvar!

[Elli Auto]

Já gaman að þessu en þetta var ekki þrautalaust en hafðist að lokum.
Til hamingju með sigurinn Sverrir.
Takk fyrir myndböndin og myndir.
Takk fyrir góða skemmtun.

[lulli]

Alveg magnaðir.
Hangið er sko ekki fyrir neinar væludúkkur, það er klárt.
Bara það að hafa trú á að og mæta á staðinn er strax prik í þessar veðuraðstæður
Til hamingju með mótið drengir og sigurinn Sverrir.

[Sverrir]

Takk, takk!