Flugmódelspjallið - flugmodel.net

TF-LBP -- dagur 92

Ég sprautaði fylligrunni á vélarhlífina og þurfti svo að bíða eftir að hann þornaði.
Og svo var pússað og pússað og pússað og ... ég er meira að segja ekki búinn: þarf að halda áfram á morgun.

TF-LBP -- dagur 93

Þegar grunnurinn var að mestu farinn sprautaði ég meiri grunni og setti svo fylliefni í allar misfellur. Þegar þær þornuðu pússaði ég þær sléttar. Svo setti ég sex lög af límbandi þar sem ég vil hafa áberandi plötuskil. Svo smurði ég þykku lagi af fylliefni að límböndunum. Þetta þarf að fá að harðna almennilega. Ég reyni að pússa þetta á morgun.

TF-LBP -- dagur 94

Hér er ég búinn að pússa og grunna plötukanntinn á vélrhlífinni.
Það eru loftop framan á hlífinni. Ég skar út umgjörðina úr áli og límdi á sinn stað eftir að hafa opnað götin. Þetta lítur smávegis út fyrir að vera Járnkallinn Toný Stark.
Og svo setti ég nokkur hnoð á flapana. Þetta er ekki algerlega nauðsynlegt, en þau voru þarna og því þarf ég að bæta þeim við.

TF-LBP -- dagur 95

Morguninn fór í að búa til máta fyrir framrúðuna. Ég notaði stíft plast sem ég klipti til og límdi saman með límbandi til að fá það form sem þarf. Ég held að þetta hafi tekist ágætlega.
Áður en ég lími rúðuna í þurfti ég að búa til hallastýris trissurnar sem eru í frambrún vængsins og vírinn sem liggur ofan í mælaborðið.

TF-LBP -- dagur 96

Ég límdi gluggana í hurðarnar í morgun. Þetta tók sæmilegan tíma: mæla stærðina, skera rúðurnar út og líma þær í. Það eru tvær rúður í hvorri hurð og það var hægt að renna þeim fram og aftur, en ég ætla bara að hafa þær fastar.
Svo dundaði ég mér við að líma flapann á vinstri vænginn. Þetta er heilmikið vesen og ég þurfti að hafa servóin tengd við móttakarann á meðan og sendinn í gangi svo flapinn gæti dottið á réttan stað.

TF-LBP -- dagur 97

Vinstri vængurinn kominn með öll stýri og tilbúinn til notkunar.

TF-LBP -- dagur 98

Allur morguninn fór í að búa til festingar fyrir stélstögin og setja þau svo saman með göfflum frá Mikka Ref og 1,5mm stálvírum sem ég silfursauð á. Gafflarnir frá Mikka eru snittaðir sitt á hvað, þannig að báðir herðast í eða losna ef maður snýr staginu.

TF-LBP -- dagur 99

Ég föndraði saman börurnar sem sjúklingurinn kemur til með að "liggja" í. Þær eru gerðar úr krossviði og balsa og vega nánast ekkert.
Ég er búinn að brjóta heilann um hvar ég ætti að setja rofana og datt niður á það í dag að setja þá í lokið yfir (undir) servóunum. Það er nóg pláss fyrir þá og þetta er eini staðurinn þar sem er hart yfirborð á skrokknum og þeir sjást ekki þegar módelið stendur upprétt.
Hér sést inn í flugklefann og sætin og börurnar skyggja á servóin og rofana. Rafhlöðurnar komast fyrir undir framsætinu eða mælaborðinu.

TF-LBP -- dagur 100

Ég náði loks í meiri silfur úða og sprautaði á hurðarnar og vélarhlífina (vantar á myndina).
Svo klippti ég út framrúðuna úr mjög meðfærilegu plasti og límdi hana niður efst og fremst með gluggalími (Canopy Glue). Þetta tekur óratíma að harðna, svo nú verð ég að bíða til morguns með að líma hliðarnar niður.

TF-LBP -- dagur 101

Lítið gert í dag vegna bakverks, en mér tókst að líma hliðarnar á framrúðunni niður.