Flugmódelspjallið - flugmodel.net

Verðum við ekki að þvívíddarprenta nokkrar hænur í skala?

Það væri ekki verra, Árni. Skalinn er 1:4.

TF-FRU -- Dagur 102

Það er ótrúkegt að maður hamast í marga klukkutíma að reikna út hvað á að mála og hvað ekki og maska allt aftur á bak og áfram. Svo tekur það bara 10 mínútur að sprauta málningunni á og rífa allt límbandið af aftur. Annars er þetta bara flottur blár litur.

TF-FRU -- Dagur 103

Ein umferð af hvítu á skrokkinn.
Textinn á vængendanum. Ég skoðaði myndir af FRUnni vandlega og komst að því að Arial er líkast þessum stöfum, svo ég prentaði þetta á sérstakan pappír sem ég get losað með vatni og límt á vængendann. Það er allt hægt nú til dags.

TF-FRU -- Dagur 104

Ég lagði FRÚna á hægri hliðina og festi vinstri vænginn á hana. Svo merkti ég staðsetningu og lag feringanna við stífurnar.
Ég setti rör yfir hausinn á skrúfunni og límdi það fast.
Bláa límbandið á að gefa lag feringarinnar þegar ég steypi það upp. Ég setti líka límband á festinguna sjálfa til að hún festist ekki innan í feringunni. Svo makaði ég Isopon P-38 á stífuna og skrokkinn þar sem feringin er. Ég gerði þetta í nokkrum atrennum.
Þegar fyllirinn var orðinn harður gat ég losað stífuna af og pússað hann til þar til réttu lagi var náð. Nú er bara að setja rauðan fylli á þetta og svo fínpússa og grunna.

TF-FRU -- Dagur 105

Nú þarf að ganga frá stífufestingunum undir vængina. En til þess þarf ég að leggja FRÚna á bakið.
Hér er ég búinn að merkja feringuna og setja rör fyrir skrúfjárnið. Ég átti ekki nægilegt af kopar rörum, svo ég setti plaströr í staðinn. Ég uppgötvaði núna að feringin er ekki nógu stór, svo ég bætti við hana út-megin við stífuna.
Svo sullaði ég P-38 á stífuna í nokkrum atrennum. Ég ætla að leyfa þessu að harðna til morguns áður en ég byrja að pússa það til.

TF-FRU -- Dagur 106

Það er fering utan um hjólastellið upp við skrokkinn og ég byrjaði á því að merkja hvar hún ætti að vera.
Svo setti ég límband (P-38 festist eiginlega ekki við þetta gula límband) og sullaði svo P-38 á staðinn. Spjöldin tvö eru þarna til að viðhalda samskeytunum á lokinu yfir stellið.
Og svo er hellingur af pússeríi. Sem betur fer á ég pússitromlu á Proxxon handfræsarann og hún kom sér vel þarna.
Hér er feringin neðan frá.
Þegar allt var orðið sæmilega hart og ég búinn að pússa það mesta, þá gat ég losað feringarnar frá. Annar hluti þeirra límist svo við hjólastellið og litli parturinn festist á lokið. Þannig getur hjólastellið gengið til í harkalegum lendingum án þess að brjóta feringuna.

TF-FRU -- Dagur 107

Hér er ég búinn að líma feringarnar á stellið og svo taka stellið af. Hér vantar smá fylliefni og grunn og svo má mála.
Búinn að sprauta með hvítu.
Þetta er lokið yfir (undir) hjólastellið þar sem það festist á skrokkinn. Feringarnar eru komnar á endana og búið að sprauta smá.

TF-FRU -- Dagur 108

Ég er búinn að liggja í flensu og kvefpest í rúma viku og hef tæplega getað staðið undir sjálfum mér, hvað þá smíðað fugmódel (þetta er ekki COVID -- ég gáði). Nú ætla ég að reyna að halda áfram og það næsta í röðinni er að setja mótorinn á, tankinn í og tengja þetta allt.

Ég fékk 47 mm langar stultur sem þeir félagar í Slippnum renndu fyrir mig og það kostaði mikið bras að koma gadaróm fyrir í boxinu, aðallega vegna þess að ég er ekki með mjög nettar hendur. Það var eins gott að ég var ekki búinn að setja framrúðuna í.
Og svo fór mótorinn á. Fyrir þá sem vilja vita, þá er þetta RCGF Stinger 30T.

TF-FRU -- Dagur 109

Orkan hjá mér er ekki enn komin á fullt, svo það var lítið gert á verkstæðinu í morgun. Ég boraði heilmikið gat á eldvegginn fyrir slöngur og leiðslur og skrúfaði kveikjuna á hliðina á mótorboxinu. Svo seti ég rör og tilheyrandi í bensíntankinn og kom honum fyrir á sínum stað. Nú vantar mig bara bensínslöngur.