Flugmódelspjallið - flugmodel.net

TF-FRU -- Dagur 110

Servóið fyrir inngjöfina komið og búinn að tengja í blöndunginn. Nú vantar bara framlengingu aftur í móttakarann og verja tréverkið fyrir olíunni úr mótornum.
Svo notaði ég tækifærið og setti skráningarnúmerið 326 (?) á stélkambinn.

Gaui skrifaði: ↑31. Júl. 2024 11:48:39Svo notaði ég tækifærið og setti skráningarnúmerið 326 (?) á stélkambinn.

Segir til um hvar í röðinni viðkomandi loftfar kemur inn á íslensku loftfaraskrána.

https://island.is/loftfaraskra

TF-FRU -- Dagur 111

Ég fann möppu úr einhverju plastefni, sem ég notaði til að búa til skapalón fyrir framrúðuna. Það var mjög auðvelt að leggja það til og líma á staðinn með límböndum og svo klippa það til þar til það passaði.
Svo lagði ég þetta skapalón á nýja þunna (0,5 mm) PETG plastefnið og skar framrúðuna varlega út.
Ég ákvað að byrja að líma framrúðuna í aðeins á einum stað svo ég þyrfti ekki að berjast við hana alla í einu. Ég límdi hana við gluggapóstinn vinstra megin og þarf svo að bíða minnst einn dag þar til límið þornar.
Í millitíðinni ákvað ég að byrja að veðra módelið. Þessi Cessna er mjög veðruð. Hér sést að ég er búinn að maka veðrun og óhreinindum neðan á hægri vænginn með þann vinstri til viðmiðunar.
Einfaldasta aðferðin er að leggja límband á plötuskilin, draga strik með þurrum pastel lit (dökk gráan hér) og svo nota stífan pensil til að draga litarefnið niður á yfirborð vængsins fyrir aftan plötuskilin. Því meiri lit sem maður leggur niður, því meira makast yfir á yfirborðið.
Hér sést það sem ég nota ti að gera þetta: pastel litir frá Faber-Castell, stífur pensill og bútur af handþurrku. Það fer mjög mikið af veðrun í kringum vængtankinn.

TF-FRU -- Dagur 112

Aðal málið í dag var að líma framrúðuna fasta.

TF-FRU -- Dagur 113

Það er breið fering neðan á framrúðunni og ég notaði uppáhalds feringaefnið mitt: P-38. Ég byrjaði á því að leggja þrjú lög af bílateipi ofan og neðan við feringuna, svo maskaði ég alla rúðuna með gulu málningarlímbandi, og smurði svo að lokum P-38 þar sem feringin á að vera.
Svo pússaði ég með P-80 sandpappír þar til bláa teipið kom í ljós.
Svo sprautaði ég fylligrunni á feringuna. Á morgun pússa ég þetta slétt og set fylliefni þar sem / ef þarf.

TF-FRU -- Dagur 114

Ég pússaði rúðuferinguna smá og tók upp bláa límbandið. Þá situr feringin eftir, sæmilega þykk. Nú boraði ég um fimmtíu 0,5 mm göt, sem ég svo undirsinkaði með því að snúa 3 mm bor í fingrunum. Þá gat ég skrúfað svo-til-ósýnilega skrúfur frá Mikka Ref í götin. Ég beygði líka til 2 mm suðuvír og kom honum fyrir þar sem eru handföng ofan á hvalbaknum á Frúnni. Nokkur hnoð við rúðupóstana og þetta fer að verða tilbúið fyrir bláa litinn.

TF-FRU -- Dagur 115

Á báðum hliðum á Cessnunni eru fótstig. Ég gerði þau úr plastræmum og festu þau á með skrúfum. (Þið afsakið fókusinn, hann er ekki góður.)
Skráningarstafirnir eru hvítir á bláum bakgrunni, og fyrst ég er búinn að sprauta hvítt, þá bara bý ég till maska fyrir stafina í tölvunni og færi þá á gult límband sem ég er búinn að leggja á skrokkinn.
Það tók svo hellings tíma að skera stafina út og rífa límbandið af þar sem blái liturinn á að koma.
Næst byrjaði ég að maska fyrir bláa litnum, en kláraði það ekki vegna þess að veðrið er ekki nógu gott til að fara með skrokkinn út og sprauta þar.
Ég fékk mjög sniðugar tengingar fyrir vænginn. Það er segulstál í þessu og þau smella saman þegar vængurinn er settur á.
Hér er ég búinn að festa tengin í vængina og skrokkinn. Nú vantar bara að lóða vírana upp á þetta svo servóin komist í samband.

TF-FRU -- Dagur 116

Það tók nokkurn tíma að lóða rétta enda við vængtengin, en nú eru þau komin.
Og hér sést ofan í skrokkinn. Þetta er allmikil flækja af vírum. Þegar ég er búinn að koma rafhlöðunum fyrir (eina fyrir fjarstýringuna og eina fyrir kveikjuna) þá laga ég þetta til og læt það hverfa að mestu.

TF-FRU -- Dagur 117

Það var ýmislegt dúllað í morgun. Ég boraði göt fyrir vængendaljósin og límdi þau í. Margir halda að það sé rangt að setja blátt ljós á hægri vænginn, en ef peran er gul innan við bláa skel, þá lítur ljósið út fyrir að vera grænt.
Ofan á stélkambinum er stórt hvítt ljós.
Það tók mig mest allan morguninn að maska stafina á hægri hliðina og maska svo allar útlínur fyrir bláa litinn. Ég þarf svo að ná mér í dagblöð eða svoleiðis (fæ ekki Bændablaðið ókeypis í hús eftir að ég flutti á Dalvík) og líma á skrokkinn. Ég sprauta bláu eftir helgina.

Gaui skrifaði: ↑17. Ágú. 2024 12:09:38Ofan á stélkambinum er stórt hvítt ljós.

Samt betra að hafa það rautt.