Flugmódelspjallið - flugmodel.net

TF-LBP -- dagur 16

Dagurinn byrjaði á tiltekt á verkstæðinu: dót sem ég átti þarna niðurfrá og hafði lítið hlutverk þar, var tekið, sett í bílinn og flutt heim í kjallarann, þar sem því ferður komið fyrir eða fyrirkomið eftir atvikum.

Ég ákvað að reyna að byrja á vængjunum og til þess þurfti ég að búa til 11 framrif á hvorn væng, sem ekki fylgja með í kittinu og eru ekki sýnd á teikningunni. Það er ljóst af myndum og teikningum og slíku að það eru framrif á milli vængrifjanna á Taylorcraft Auster, svo ég verð að búa þau til og líma þau á sína staði.
Næst þurfti ég að framlengja vængbitana. Þeir eru fjórir. Efnið sem ég fékk er 914mm eða þar um bil en þeir þurfa að vera rúmlega 1200mm.
Ég skar efri afturbrún og flapsa úr 1,5mm krossviði. Ég hugsa að ég geri neðri afturbrúnina úr balsa, en ég á nægan krossvið sem ég get notað í hana. Neðri afturbrúnin verður ekki nema 10mm eða svo fyrst ég ætla að setja flapsa.
Ég skar neðan úr fimm rifjum no. 2 fyrir flapsanum. Rifin eru gerð úr léttkrossviði og auðvelt að skera þau með beittum hníf.
Nú get ég byrjað að máta rifin á rétta staði.

TF-LBP -- dagur 17

Þá er ég byrjaður að raða vængnum saman og allt virðist ætla að ganga upp.
En, þegar kom að hallastýrinu var ekki allt eins og það átti að vera. Hallastýrisbitinn (3mm léttkrossviður) og rifin fyrir framan hann pössuðu engan veginn saman. Ég lagðist í hux og spögguleringar og var jafnvel kominn á þá skoðun að ég þyrfti að búa til ný rif, þegar ég uppgötvaði að það var bitinn sem var ekki réttur. Raufar fyrir rifin eru skornar í ranga átt. Í staðinn fyrir að vera neðan á bitanum, þá eiga þær að vera ofan á honum, og það sem eru raufar er það sem á að vera eftir þegar búið er að gera raufarnar.
Ég sagaði út nýja bita og þá ganga rifin og bitinn svona saman:
Þá gat ég lagt niður restina af rifjunum með nýja hallastýrisbitann eins og hann á að vera..

TF-LBP -- dagur 18

Ýmis smáverk við vænginn í dag: Ég lokaði vængnum og styrkti hann fyrir framan flapsann með 5mm balsa.
Ég setti smárif frá frambrún að vængbita og límdi svo balsa framan á frambrúnina. Teikningin segir mér að setja 2,5mm balsaplötu á frambrúnina, en frumgerðin er ekki þannig lokuð. Það sést, hins vegar, mjög greinillega að það eru stutt rif á milli heilrifjanna og ég ætla að gera það þannig. Hugsanlega þarf ég að styrkja vænginn á einhvern máta, en við komum að því síðar.
Ég setti hallastýrið saman. Nú þarf bara að pússa það til og forma frambrúnina á því.
Ég var lengi að finna út hvar þessir sveigar eiga að koma. Ég meira að segja spurði hönnuðinn, Jerry Bates, en hann mundi ekkert hvar. Svo kom þetta í ljós. Þetta eru vængendarnir! sá þykkari ofan á hluta TC og sá þynnri undir.

TF-LBP -- dagur 19

Morguninn fór í eitt verk: að setja vefi á milli vængbitanna. Þetta er frekar tímafrekt verk, en ágætlega gaman. Ég skar vefina í rétt hæð til að þeir pössuðu á milli bitanna. Svo mátaði ég þá og skar af þeim þar til þeir smullu á milli rifjanna.
Svo langaði mig að styrkja fremri bitann af því ég sleppi klæðningunni sem myndar D-boxið. Ég á kolfíberþræði, sem ég keypti fyrir fjölda ára (hef ekki hugmynd hvað ég ætlaði að gera við þetta) og lagði þá í epoxý kvoðu ofan á frambitann. Ég mun síðar setja svona neðan á hann líka. Mér skilst að þetta styrki bitann ógurlega.

TF-LBP -- dagur 20

Ég límdi ræmur af 2,5mm balsa ofan á öll rifin. Það viðurkennist að þetta tók meira en einn dag, en við sættum okkur við það.
Þegar ég gat loks snúið vængnum við þurfti ég að ganga frá ýmsu. Hér er t.d. festing og lok fyrir hallastýris servóið.
Og hér á flapsa servóið að sitja. Ég ætla að sjá til hvort ég set lok yfir það, en þá get ég ekki klætt með dúk fyrr en flapsinn er kominn á sinn stað. Stýrisstöngin kemur ekki niður úr vængnum.

TF-LBP -- dagur 21

Servófestingar. Festingarnar sem fylgdu fyrir hallastýris servóin voru of litlar, svo ég skar út nýjar úr 3mm krossviði. Ég þarf líklega að þynna þær örlítið.
Festing fyrir flapsa servóið. Bitarnir sitja á efri rifjaræmunum og svo skrúfa ég krossviðarplötu á þá. Servóin skrúfast föst í kubbana, en það verður (líklega) engin lúga. Servó eru orðin svo góð í dag að maður þarf ekkert að hafa aðgang að þeim.
Kolfíber rönd neðan á aðal bitann. Eftir það gerir maður ekki mikið meira þann daginn.

TF-LBP -- dagur 22

Rifjaræmurnar á neðra borð vængsins eru allar komnar á. Það sést líka glitta í pappírs rör fyrir servósnúrurnar.
Kubbar sem aukastífurnar stingast í eru komnir á sína staði.
Og hér er umgjörðin utan um lokið sem hallastýris servóið festist á.

TF-LBP -- dagur 23

Búinn að pússa hallastýrið, forma frambrúnina og taka úr fyrir lömunum.
Rifjaræmurnar (cap strips) pússaðar og frambrúnin tekin í gróft lag. Ég geng ekki endanlega frá frambrúninni fyrr en báðir vængir eru komnir á þetta stig.
Vængendinn formaður ofan og neðan. Þetta kemur verulega vel út.
Klippti til og beygði stálteinana sem eiga að mynda hjólastellið. Þessir þrír bútar verða svo silfurkveiktir saman.

TF-LBP -- dagur 24

Beygði til og stillti upp hjólastellinu og silfurkveikti það svo saman. Það var alveg á mörkunum að Dremel gastækið mitt væri nógu heitt fyrir svona teina. Svo vafði ég koparvír utan um samskeytin og setti venjuegt tin í vafninginn.

TF-LBP -- dagur 25

Ég setti krossa í vænginn til að stífa hann betur af. Þetta eru 3mm grillpinnar úr bambus.
Hjólin komin á og Austerinn stendur nú í lappirnar. Það var ótrúlega erfitt að græja dekkin því ég þurfti að skrúfa þau saman með þrem boltum. Ég ætlaði aldrei að hitta í götin með boltunum.
Eitt erfiðasta verk í módelsmíði er að gera einn vinstri væng og einn hægri væng. Það næst erfiðasta er að gera eina vinstri skrokkhlið og eina hægri. Ég gáði nokrum sinnum að ég væri örugglega að gera hægri vænginn núna.