Það er liðinn góður tími frá síðustu færslu og ástæðan er ekki skemmtileg. Filman sem ég notaði dugði ekki og ég þurfti meira af henni. Til að byrja með bað ég Jón VP um að ná í meiri filmu handa mér, en hann ætlaði ekki að panta alveg strax, svo ég ákvað að kaupa hana sjálfur frá verslun í Englandi. Ég þurfti líka að kaupa rúllu af Oratex, svo ég leitaði að verslun sem seldi bæði filmuna og Oratexið. Ég fann hana fljótlega og pantaði það sem mig vantaði. Kostnaðurinn var um 300 GBP með sendingu. Ég lagði inn pöntun hjá þeim þann 3. júní og borgaði með PayPal.
Nú leið og beið og ég bjóst við að fá sendinguna fljótlega. Þegar mánuður var liðinn hringdi ég í verslunina og spurði hvort þeir vissu um staðsetningu pakkans. Þeir lofuðu að senda mér rakningarnúmer umsvifalaust. Ég notaði svo þetta númer til að fylgjast með ferð pakkans. Hún var skrautleg.
Rakningin sýndi mér að pakkinn hafði ekki farið í póst fyrr en 4. júlí. Daginn sem ég hringdi. Heilum mánuði eftir að ég pantaði vöruna. Og svo byrjaði ferðalagið. Varan var greinileg afhent 4. júl. í bæ í Englandi sem heitir Dartford. Þaðan fór hann tveim dögum seinna til Milton Keynes og svo samdægurs til Duiven í Hollandi. Hollendingum leist ekkert á þennan pakka og sendu hann viðstöðulaust til baka til Milton Keynes. Daginn eftir prófuðu þeir að senda hann til Wiesbaden í Þýskalandi, sem sendu hann samdægurs til Kölnar. Daginn eftir, 8. júl. fór pakkinn aftur til Wiesbaden og þaðan til baka til Kölnar.
Nú virðist sem einhverjum hafi dottið í hug að lesa á pakkann og þann 10. júl. er hann á leið til Reykjavíkur. Loks, þann 13. júlí er mér sagt að flutningfyrirtækið hafi afhent pakkann óskemmdan. Þetta kom mér á óvart, því ég var ekki búinn að fá neitt. Ég hringdi í Icetranspoprt og spurði hvað hefði orðið um pakkann og þeir sögðu mér að hann hefði farið í póst þann 13. Sem sé, afhending er þegar pakkinn fer í póst í Reykjavík á leið til Dalvíkur. Í dag, 17. júlí fór ég í póstinn og fékk pakkann.
Hérna sést það sem kom úr kassanum. Á pakkanótunni sést að þetta var pantað 03/06/2023. Á öðrum fylgiskjölum sést að þessu var pakkað 20. júní. Síðan virðist pakkinn hafa gleymst í búðinni þar til ég hringi 4. júlí.
- 20230717_105148.jpg (129.81 KiB) Skoðað 1778 sinnum
Og nú get ég haldið áfram að klæða MIGHTY BARNSTORMER, enda ætlaði ég að hafa hann tilbúinn á flugdeginum okkar. Vonandi næ ég því. S.E. 5a þarf að bíða.
- 20230717_121931.jpg (125.37 KiB) Skoðað 1778 sinnum
Ég er svona það sem kallað er Trendsetter, það bara tekur enginn eftir því.
Bara átta kveðjur
Guðjón Ólafsson - Eyjafirði
