Flugmódelspjallið - flugmodel.net

TF-LBP -- dagur 82

Ég skrúfaði báðar hurðirnar á og setti álklæðninguna á vinstri hliðina.
Hurðirnar smella í og er haldið með segulstálum. Nú þarf ég að klæða hurðirnar með áli og setja gluggana í.

TF-LBP -- dagur 83

Ég klæddi báðar hurðarnar með þunnu prentplötu áli (0,2mm).
Mér fannst ekki alveg öruggt að láta tvö segulstál halda hurðunum lokuðum, svo ég setti læsingar innan í þær líka.
Hér sést hvernig læsingin stendur út úr hurðinni. Ég límdi þær svo vel og vandlega með epoxy og örperludufti (microballoons).

TF-LBP -- dagur 84

Ég klippti til hurðaspjöld úr Cheerios pakka, límdi þau innan á hurðarnar og málaði með innangrænum (interior green).
Cheerios pakkinn fór líka innan í skrokkinn fyrir aftan hurða opin.
Svo málaði ég Innangrænt inn í flugklefann, nema gólfið.
Að lokum byrjaði ég að klippa út mæla og líma þá í mælaborðið, því ég verð að klára það og líma það á sinn stað áður en ég set ál á hvalbakinn undir framrúðuna.

TF-LBP -- dagur 85

Ég kláraði að setja saman mælaborðið og svo límdi ég það á sinn stað.
Ég límdi álþekjuna á hvalbakinn. Ég þurfti að nota tvo búta til að þekja allan hvalbakinn og svo notaði ég tveggja þátta fylliefni til að fylla á milli þeirra.

TF-LBP -- dagur 86

Ég silfurkveikti millistífurnar úr 3mm og 2mm suðuvír.
Svo setti ég millistífurnar á sína staði, en því miður er myndin ekki í fókus.
Svo byrjaði ég að pússa fylliefnið á hvalbaknum. Það er ekki hlaupið að því.

TF-LBP -- dagur 87

Ég dundaði við það í morgun að líma lamir í stélstýrin og setja þau svo á stélið. Ég gleymdi að taka mynd, en ég setti stélhjólið á líka.
Ég grunnaði hvalbakinn og setti svo 3M Stopper fylliefni í rifur og stop (flettu því upp!).
Ég heflaði og pússaði heilmikið efni af vélrhlífinni til að fá nokkurn vegin rétta formið á hana. Svo setti ég fylliefni á balsann sem ég pússa niður þegar ég held þessu áfram.

TF-LBP -- dagur 88

Ég lauk við að pússa og forma framhlutann á vélarhlífinni. Þá gat ég sett glerfíber á hana aftur að plötunum sem hlífin er gerð úr. seinna set ég krossviðar klæðningu á hlífina og hún kemut til með að ná um 10 mm aftur á skrokkinn. Þar get ég sett skrúfur.
Framrúðan á þessum Auster er í þrem hlutum. Miðjan er bein og hliðarnar eru bognar, svo það ætti að vera auðvelt að forma glerið. Ég setti bambus grillteina þar sem hornið á glugganum verður. Svo málaði ég hvalbakinn með svartri málningu. Ég þarf líklega að pensla annarri umferð til að fá jafna áferð.

TF-LBP -- dagur 89

Dundaði mér við vélarhlífina í dag. Ég setti tungur á hliðarnar á henni og eina að ofan. Ég gróf fyrir hliðartungurnar og setti kolfíber rör þar fyrir innan svo skrúfur hefðu eitthvað að bíta í. Svo setti ég tvo krossviðar panela á hlífina. Það var ekki auðvelt því það eru flóknar beygjur á hlífinni.

TF-LBP -- dagur 90

Meira snudd við vélarhlífina: ég klæddi hana með 0,4 mm krossviði að neðan og setti svo 48 g glerfíber á hana.

TF-LBP -- dagur 91

Það eina sem ég gerði í dag var að pússa glerfíberinn á vélarhlífinni og svo pensla epoxý kvoðu á hana. Svo get ég grunnað þetta á morgun og fínpussað, eins og reglurnar segja til um.