Flugmódelspjallið - flugmodel.net

Hið mánaðarlega flotkvöld var á sínum stað og eftir heilan dag af rigningu og fjöri tók loksins að létta til upp úr 16 og um 19 var komin blár himinn og þvílíka blíðan. Enda var vel mætt og mikið flogið, Twin Otter deildin var full skipuð og aðrir fjölmenntu á vatnið. Eitt hallastýrisservóið í Beaver var við það gefast upp og þá var ekkert annað að gera en að skipta því út til að geta haldið leikum áfram.

Í framhaldi af því tók Bjórinn svo upp á því að „festast“ skammt frá vesturbakkanum eftr smá kollhnís og rek, björgunarbátur var sendur út með línu en stoppaði rétt við Bjórinn. Kom þá í ljós að hann var fastur í gróðri sem vafði sig um skrúfuna á bátnum og braut drifið. Þá voru góð ráð dýr en eftir að hafa rígbundið beltið um sig miðjan náði Örn að komast að Bjórnum í vöðlunum og bjarga honum í land.

Ævintýrin gerast svo sannarlega við Seltjörnina!