Úr loftnetsfræði 101 eftir Olla ofvita:
(Þeir sem ekki nenna að lesa hoppi niður í **)
Lengd loftnets þarf að passa sem best við sveiflulengd bylgjunnar sem það ætlar að meðhöndla. Hún þarf nefnilega að "óma" í takt við óm loftnetsins ef svo má segja. Svona eins og gítarstrengur eða þannig.
Lengd bylgjunnar er hraði ljóssins í m/s deilt með sveiflutíðni bylgjunnar í sveiflum á sekúndu. Þá liggur í augum uppi að til þess að fá út bylgjulengdina deilir maður hraða ljóssins með tíðninni, sekúndurnar styttast út og eftir verða metrar/sveiflu.
Hraði ljóssins er sem næst 300 milljón metrum á sekundu. 300 milljón metrar á sekúndu deilt með 35 milljón sveiflum/sekúndu (MHz stundum kallað "megarið") verður 300/35 = 8,57 metrar. Nú er ekki hlaupið að því að sveifla tæplega níu metra spjóti á fjarstýringunni. Það vill svo til að það er oft hagstæðast að nota bara fjórðung lengdarinnar sem þá er ca 2,14 metrar en það er enn of langt svo helmingurinn af því er kannski praktískari, sem sagt 1,07 metrar. Sem sagt einn áttundi sveiflunnar en það er ekki sérlega hagstætt svo sem.
En málið flækist enn meir þar sem við erum ekki í tómarúmi svo aðeins styttra loftnet gæti dugað betur.
Og svo er spurning um rakastigið og...
Og svo væri kannski hægt að safna hluta loftnetsins upp á spólu í sendinum og svo þarf þverviðnámið að stemma og... og svo.. og svo framvegis.
**
Staðreyndin er að loftnetssmíði er svaka vísindagrein.
Þegar sendir/móttakari eru hannaðir þá er reynt að nálgast bestu stærðir út frá ýmis konar málamiðlun. Til dæmis hvort hægt er að halda á draslinu. Það sem svo er gert er að stilla ("tjúna") loftnetið með spólum og græjum svo það nái sem bestri nýtni.
Þetta þýðir að ef maður ætlar að fikta eitthvað með að ná betri nýtni með því að breyta lengd eða formi netsins er eiginlega óhjákvæmilegt að geta mælt svokallað standbylgjuhlutfall SWR-ratio og stilla eftir því. Maður sér oft í umræðu um loftnet talað um SWR hlutfall, sem þarf að vera sem næst 1,0.
Sem sagt. Það borgar sig yfirleitt ekki að fikta í draslinu sjálfur. If it works don't fix it.
Alla vega ekki þegar gott og fallegt flugmódel er í húfi.
Svo er annað mál hvort maður kaupir eða smíðar samkvæmt hönnun manna eins og
Alex (IBCrazy) Greve sem kann þetta og á standbylgjumæla og hefur mælt og pælt.
Hringpólaríseruðu loftnetin eru til dæmis góð fyrir 2,4-5,8 GHz senda en ef maður ætlar að smíða svoleiðis fyrir átta og hálfs metra langa byglju 35 MHz í fjarstýringunum, þá þarf ansi mikið pláss.
Bylgjulengd 5,8 Gígariða vídeósendis er rúmir fimm sentimetrar.
Gott að hafa eitthvað að dunda við þegar maður bíðu efitr flugi
Kveðjur frá Kastrup.
