Helgafell - 30.apríl 2023 - Iceland Open F3F 2023 - Dagur 2

[Sverrir]

Sunnudagurinn hófst einnig bjartur og fagur en talsvert hlýrri og var hitinn í kringum 5°C. Vindurinn blés kröftuglega á brekkuna og gengu fyrstu umferðirnar nokkuð vel fyrir sig. Viðgerðin á hljóðtenginu tókst vel til og var það ekki til frekari vandræða. Umferðir 8 og 9 kláruðust nokkuð fljótt en eftir því sem leið á umferð 10 fór að sjást lægri vindhraði og tíma keppenda fóru niður á við en uppstreymisbólur áttu nokkuð reglulega leið hjá. En það tókst að ljúka umferðinni og eftir smá fund með flugmönnum var ákveðið að flýta hádegishlénu og sjá til ef vindurinn yrði stöðugur á nýjan leik.

Eftir hádegishléð leit út fyrir að vindurinn væri komin aftur og Peter Gunning var ræstur út sem fyrsti flugmaður í elleftu umferð en um leið og honum var skutlað fram af þá datt vindurinn niður í nánast ekki neitt og hann fór beinustu leið niður, niður, niður! Þökk sé góðum flughæfileikum tókst Peter að halda sér uppi þangað til hann fann uppstreymisbólu og tókst að koma sér upp í nægjanlega hæð til að koma inn og lenda eftir um fjögurra mínútna flug. Eftir um klukkutíma bið þá virtist sem Kári væri ekki á þeim buxunum að halda áfram að blása og því var boðað til fundar og frekari flug blásin af þann daginn um 1400.

Dagur 1 | Dagur 2 | Dagur 3

[Sverrir]

Fleiri myndir.